സൗദി അറേബ്യയിൽ വിമാന സർവീസുകളിലെ തടസ്സം തുടരുന്ന പശ്ചാത്തലത്തിൽ, അവിടെയുള്ള ഇന്ത്യൻ പൗരന്മാർ ജാഗ്രത പാലിക്കണമെന്നും പ്രാദേശിക അധികൃതരുടെ നിർദ്ദേശങ്ങൾ കർശനമായി പാലിക്കണമെന്നും റിയാദിലെ ഇന്ത്യൻ എംബസി പുതിയ ജാഗ്രതാ നിർദ്ദേശം നൽകി. വ്യോമാക്രമണങ്ങൾ പോലെയുള്ള അടിയന്തര സാഹചര്യങ്ങളുണ്ടായാൽ വീടുകൾക്കോ കെട്ടിടങ്ങൾക്കോ ഉള്ളിൽ തന്നെ കഴിയണമെന്നും സംഭവങ്ങളുമായി ബന്ധപ്പെട്ട വിവരങ്ങളോ ചിത്രങ്ങളോ വീഡിയോകളോ ചിത്രീകരിക്കാനോ സോഷ്യൽ മീഡിയയിൽ പങ്കുവെക്കാനോ പാടില്ലെന്നും എംബസി പ്രത്യേകം മുന്നറിയിപ്പ് നൽകി.
ഒക്ടോബർ 10-ന് റിയാദ് വിമാനത്താവളത്തിലുണ്ടായ ആക്രമണത്തിൽ പരിക്കേറ്റ ആറ് ഇന്ത്യൻ പൗരന്മാർ ചികിത്സയിൽ തുടരുകയാണെന്ന് എംബസി വ്യക്തമാക്കി. ഇതിൽ രണ്ടുപേർ തീവ്രപരിചരണ വിഭാഗത്തിലും ഒരാൾ ഹൈ ഡിപൻഡൻസി യൂണിറ്റിലും മറ്റു മൂന്നുപേർ സാധാരണ വാർഡിലുമാണ് ചികിത്സയിലുള്ളത്. നിലവിൽ റിയാദ് അന്താരാഷ്ട്ര വിമാനത്താവളം അടഞ്ഞുകിടക്കുകയാണ്. ദമാം, ജിദ്ദ, മദീന വിമാനത്താവളങ്ങൾ പ്രവർത്തിക്കുന്നുണ്ടെങ്കിലും ചില സർവീസുകളിൽ തടസ്സം നേരിടുന്നുണ്ട്.
ഇന്ത്യൻ വിമാനക്കമ്പനികൾ സൗദിയിലേക്കും തിരിച്ചുുമുള്ള സർവീസുകൾ താത്കാലികമായി നിർത്തിവെക്കുന്നത് നീട്ടിയിട്ടുണ്ട്. എയർ ഇന്ത്യയും എയർ ഇന്ത്യ എക്സ്പ്രസും ഒക്ടോബർ 20 വരെയും ഇൻഡിഗോ ഒക്ടോബർ 24 വരെയും സർവീസുകൾ നിർത്തിവെച്ചു. അകാസ എയർ റിയാദ് സർവീസുകൾ ഒക്ടോബർ 24 വരെയും ജിദ്ദ സർവീസുകൾ ഒക്ടോബർ 21 വരെയുമാണ് റദ്ദാക്കിയിട്ടുള്ളത്. അതേസമയം, സൗദിയ എയർലൈൻസ് ദമാം, ജിദ്ദ, മദീന എന്നിവിടങ്ങളിൽ നിന്ന് ഇന്ത്യയിലേക്ക് സർവീസ് നടത്തുന്നുണ്ട്. ഫ്ലൈനാസ് ദമാം-ലഖ്‌നൗ റൂട്ടിലും ഫ്ലൈഡീൽ ഒക്ടോബർ 17, 18 തീയതികളിൽ ദമാം-മുംബൈ റൂട്ടിലും സർവീസ് നടത്തും.
അടിയന്തരമായി നാട്ടിലേക്ക് മടങ്ങേണ്ട പ്രവാസികൾ ആവശ്യമായ വിസകൾ സ്വന്തമാക്കി ബഹ്‌റൈൻ, കുവൈറ്റ്, ഖത്തർ എന്നീ അയൽരാജ്യങ്ങൾ വഴി യാത്ര ചെയ്യുന്ന കാര്യം പരിഗണിക്കാമെന്ന് എംബസി അറിയിച്ചു. ഉംറ തീർത്ഥാടനത്തിന് ഉൾപ്പെടെ സൗദിയിലേക്ക് വരാൻ പദ്ധതിയിടുന്നവർ വിമാന സർവീസുകളിലെ അനിശ്ചിതത്വവും യാത്ര നീണ്ടുപോകാനുള്ള സാധ്യതയും കണക്കിലെടുക്കണമെന്നും അധികൃതരുടെ നിർദ്ദേശങ്ങൾ പാലിക്കണമെന്നും എംബസി ഓർമ്മിപ്പിച്ചു.
Content Highlights: India’s Embassy in Riyadh has urged Indian citizens to follow local safety instructions, remain vigilant and expect possible flight disruptions amid the prevailing situation in Saudi Arabia.